有几年没出新歌的黄贯中（Paul）终于推出新歌《何车AHEM》，一向热爱音乐的他包办歌曲的作曲和填词，Paul式摇滚乐令人十分期待！
谈起出新歌的感觉，Paul表示自己已不记得太久远的事：「我记得上次推出新歌时囡囡啱啱出世。上次推出新歌到而家，至少有两三年，不过感觉好似已经二十年」他指自己以往比较高产，「忽然两三年无做，感觉就好似过咗十年咁样！」 至于新歌有何意思，Paul则认爲音乐能代表自己的想法：「无能力喺度讲到首歌原本想表达咩嘢，或者就算有能力我都唔係好想讲晒出嚟。正因为我无办法讲晒出嚟，所以至需要音乐去帮我讲。」他指音乐最美好和特别之处在于「各自都有自己嘅解读，呢个反而係我唔想讲写呢首歌意思嘅原因」。
音乐有意义之馀，原来音乐MV也大有来头。这次的新歌MV以电影拍摄方式製作，Paul特地找来多才多艺的泰迪罗宾帮忙，「多谢泰迪罗宾先生，因为佢真係帮咗我好大忙，其实係全靠佢。而家大家觉得好有电影感，Teddy除咗懂得电影，最紧要仲识得音乐，我唔使讲咁多嘢，佢已经明白我想表达咩嘢，除咗内容，甚至音乐上想表达咩嘢佢都知道，我其实好开心、好满意。」
MV在中环码头及屋邨等地拍摄，Paul邀请了不少音乐人参与创作，如玩busking的音乐爱好者、街舞舞者、广场舞大妈，甚至四代同堂的家庭组合！MV中也可见Paul在閙市中夹band的画面，他一人身兼结他手和主唱，场面十分热闹。Paul透露《何车AHEM》节奏感较强，希望观众听后能更加精神和开心。
Paul亦希望MV能融入不同的色彩，故加入香港随处可见的事物：「我觉得香港如果係一幅画，就係有好多唔同颜色混埋一齐，有红有绿有蓝有黄有黑，每一种颜色都混埋一齐就会变得好靓。」从MV花絮中可见，Paul的画室中挂满油画。他拍摄MV时也搞笑地为自己的脸画鬼脸，可谓童心未泯。
MV在三月拍摄，碰巧撞正Paul的五十五岁生日。Paul在拍摄期间收到生日蛋糕，令他十分惊喜，更五体投地感谢这份意料之外的生日礼物。近年一直和叶世荣举行演唱会的他，希望能再次在香港表演：「早前喺佛山玩得好开心，但都好希望可以同样喺香港玩得咁开心。我觉得一定要喺香港举行，又唔一定要喺红馆嘅，总之必须要喺香港举行一次嘅。」期待Paul在香港的演出！
