93年 Beyond主音黃家駒在日本宣傳時從三米高台墮下頭部重創，昏迷一星期後不治，在家駒的喪禮上，其歌手女友林楚麒（ Gina）以「未亡人」身份現身，此後她便像人間蒸發，絕跡香港娛樂圈。
今年 5月尾，林楚麒與同屆新秀莫鎮賢重返樂壇，頭炮是舉行自傳式音樂劇《我的八十、九十、千禧回憶》，負責策劃音樂劇的莫鎮賢表示，早年她最愛錫的妹妹在非洲 遇交通意外過身，他與林楚麒同樣飽受失去摯愛傷痛，兩人的療傷過程，將會搬上舞台。
而失蹤 17年的林楚麒自家駒死後曾患抑鬱症，今次重新振作，全為延續家駒的不死精神，她坦言至今未忘家駒，並說：「我會梳起唔嫁。」年過 40歲的林楚麒最後一次公開露面，是在 93年家駒的喪禮上，當年她與家駒因拍港台劇《暴風少年》而認識， 88年發展地下情， 89年情人節，兩人更在 Beyond其餘三位成員面前訂婚，拍拖 5年便要面對生離死別，令林楚麒一蹶不振，之後更決心退出娛樂圈治情傷，為父親打理文具生意。
誤傳林楚麒死訊
十幾年來，林楚麒與圈中人零接觸，這次復出全因接受同屆新秀好友莫鎮賢邀請。莫鎮賢回想起 與林楚麒的再遇，絕對係一個大笑話，他說：「早年有個朋友同我講林楚麒死咗，我信以為真。直至幾年前，我喺表演活動中撞到林楚麒姨甥女，我問佢阿姨葬喺 邊，點知佢話阿姨未死，仲即場打俾林楚麒，當時我好激動，忍唔住喊出嚟。嗰時咁啱我籌備緊復出，我問佢有冇興趣出返嚟唱歌。佢話好多年冇唱唔知得唔得，我 同佢講樂壇需要有實力派，加上近年好興復出，最後成功游說佢加盟我公司。」
林楚麒聽到自己被誤傳死訊不怒反笑，「我冇嬲呀！只係覺得好好笑。呢 17年我收埋自己，仲患過抑鬱症，時間超過十年。依家我已經裝備好自己，重新開始。」細 說跳樓誤會
林楚麒訪問當日澄清在家駒喪禮上並冇企圖跳樓，之後更即場示範（右圖），「我走出靈堂發現 大批記者，突然間好驚，所以走咗入女廁靜吓，正當我想推開隻窗唞氣時，有個男記者一手推門入嚟狂影相。個窗高到上我心口，點跳呀？」
唔會接受其他男人
林楚麒重新振作，但內心仍忘不了家駒。記者問她這 17年來的感情生活，她斬釘截鐵地回應：「呢十幾年我冇拍拖，我已經梳起唔嫁，唔諗住再接受其他人，就算有人追都唔會俾機會。（如果遇上絕世好男人呢？） 咁佢會好不幸。我重新發展我嘅演藝事業，但唔代表我會 delete（刪除）家駒喺我心裏面嘅地位。」
林楚麒與莫鎮賢 5月 28至 29日將在尖東華懋廣場舉行音樂劇《我的八十、九十、千禧回憶》，內容講述兩人由 85年出道至今的經歷，到時他們除了唱大量華星年代舊歌外，亦會演唱時下新歌。身為搞手的莫鎮賢會把兩人痛失摯愛的經歷搬上舞台，「我會將林楚麒出席家駒 喪禮嘅一幕重演，當年佢喺女廁突然推開窗，記者以為佢想尋死，其實佢只係想開窗唞氣，好搞笑。我亦會藉住呢個音樂劇悼念我妹妹，當年我退出樂壇同妹妹一齊 做寶石生意，妹妹知道我仲好鍾意唱歌，就話希望見我重返樂壇。可惜佢喺 06年我生日嗰日撞車去咗！我同佢感情好好，所以打擊好大，為咗完成佢心願，我結束珠寶生意，籌備呢個音樂會。」
此外，莫鎮賢將於 7月與林楚麒推出新唱片，兩人除翻唱林楚麒的經典名曲《這就是愛》外，更有一首講述生離死別的勵志合唱歌，希望有同樣經歷的人得到慰藉。
93年黃家駒在日本宣傳一去不返，曾令林楚麒傷心欲絕，更為他患上抑鬱症。《壹本便利》圖片
93年未亡人現喪禮
當年林楚麒在家駒的喪禮上，突然頭戴白花以「未亡人」身份出現，受到外界的非議，但原來兩人早在 89年已訂婚。
做運動減磅
絕跡娛樂圈 17年的林楚麒，將於今年 5月與莫鎮賢重踏舞台演出音樂劇。林楚麒笑言當前最急切是減肥，在莫鎮賢鞭策下，現時她每天都努力節食及做運動。
莫鎮賢近年自資開設製作公司「金掌」，林楚麒是他旗下第一位歌手，之後他會繼續羅致舊歌手，亦會培育新人。
85年同屆新秀出道
林楚麒 85年參加第 4屆新秀獲季軍，而莫鎮賢則獲最佳舞台表演獎。當年的冠軍杜德偉與亞軍蘇永康，現時仍在樂壇打滾。
86年參加東京音樂節
出道後一年，林楚麒即代表香港參加東京音樂節，當年娃娃瞼的她非常討好，更曾被黃霑批她會威脅到梅豔芳。
巨肺女歌手
當年身材豐滿的林楚麒，被指是繼甄妮後的新一代「巨肺」，不過有傳她在華星期間，與梅豔芳不和而受到打壓。
轉行做時裝
家境富裕的莫鎮賢中學畢業後，於香港時裝設計學院主修時裝設計，他曾當模特兒，到 85年成為歌手，但因發展平平， 89年毅然離開樂壇開時裝店（圖）。
鄺美雲一直扶持
妹妹過身後，莫鎮賢成立「金掌」復出樂壇，而他在華星年代已認識的好友鄺美雲亦全力支持。
90年曾復出
莫鎮賢曾於 90年復出， 92年推出由他親自做監製的首張個人大碟《 I’M CRYING》，之後與妹妹開始搞寶石生意。
