一度公開唔妥的 Beyond成員黃家強及黃貫中（ Paul），上週五（七月廿四日）在紅館舉行三場「 This is Rock n Roll」「復合」演唱會。開騷首晚，二人口口聲聲話如果世榮踩場，一定拉他上台一齊玩，又指對方鍾意搞驚喜，暗示世榮隨時會現身。
純粹齋噏，世榮原來一早由北京轉飛蒙古，為同期（上週五）開始一連三日的蒙古草原音樂節做壓軸嘉賓，八月初才會返港為「動漫節」演出。
大飛頂世榮
去年阿 Paul與世榮在北京舉行「 Beyond雙傑演唱會」，引起家強不滿，更觸發與阿 Paul兄弟不和，展開罵戰。以為關係無彎轉，原來二人今年初已擺埋和頭酒，計劃在紅館開騷合作銀。
Beyond 再開騷，二人卻沒有預當日幫口化解誤會的鼓手葉世榮，阿 Paul及家強在台上說：「其實一直都有人搵我哋組番 Beyond開騷，咁啱世榮個期有嘢做，無論以 Beyond、阿 Paul同世榮或個人形式，我哋都做過，今次阿 Paul加家強，可能又有新火花。」
首晚演出後，對沒有世榮同台演出，二人齊聲說：「咪係冇咗世榮嘅嘢囉！」冇咗世榮，演唱會搵來大飛（前 LMF鼓手陳匡榮 Davy）幫手。
是但噏
不過，家強、阿 Paul似乎不清楚世榮其實身在蒙古做騷，當晚還說：「如果佢得閒會嚟，佢（世榮）好有心，送咗好大個花籃，如果佢喺台下，一定會拉佢上嚟玩。佢一向鍾意俾驚喜我哋。」
事實上，一直身在內地的世榮於上週四（廿三日）已由北京飛到蒙古，出席一連三日的「綠色旗幟草原音樂節」，之後再折返北京，為八月推出的新碟《慈悲》宣傳。
北京出碟
「其實呢個音樂會（草原音樂節）好早傾好，有好多內地不同樂隊、歌手好似陳小春都有份演出。加上安排咗嘅唱片宣傳，啲期唔郁得。好了解歌迷好想我哋一齊玩，但要重組 Beyond，出新碟、宣傳、巡迴，起碼要一年時間，但呢一年已排咗自己出碟，歌迷會支持我哋各自發展。」在北京接受長途電話訪問的世榮，對被飛出今次演唱會，撐得就撐。
